ఉపాధి హామీలో అక్రమాల పర్వం: గోడితిప్ప ఫీల్డ్ అసిస్టెంట్పై కలెక్టర్కు ఫిర్యాదు.
డా. బి.ఆర్. అంబేద్కర్ కోనసీమ జిల్లా, అల్లవరం మండలం, గోడితిప్ప గ్రామ పంచాయతీలో మహాత్మా గాంధీ జాతీయ ఉపాధి హామీ పథకం పనుల్లో భారీ అక్రమాలు చోటుచేసుకున్నట్లు గ్రామస్థులు ఆరోపిస్తున్నారు. గ్రామంలో జరిగిన సామాజిక తనిఖీ (సోషల్ ఆడిట్) సందర్భంగా ఫీల్డ్ అసిస్టెంట్ అనుసరిస్తున్న అవినీతి పద్ధతులు వెలుగులోకి వచ్చాయి.
అక్రమాల తీరు ఇదీ..
గ్రామస్థులు జిల్లా కలెక్టర్కు సమర్పించిన ఫిర్యాదు ప్రకారం, అనేక అక్రమాలు వెలుగుచూశాయి.
గ్రామంలో లేని వారికి మస్తర్లు గత మూడు సంవత్సరాలుగా కాకినాడలో నివసిస్తున్న కొప్పాడి అనంతలక్ష్మి పేరున 50 రోజుల మస్తరు వేయడమే కాకుండా, ఆమె సంతకాన్ని కూడా ఫోర్జరీ చేసినట్లు గుర్తించారు.
విదేశాల్లో ఉన్నా పనులు చేసినట్టు రికార్డు, సుమారు రెండేళ్లుగా విదేశాల్లో ఉంటున్న వనమాడి సత్యవతి దంపతుల పేరున కూడా అక్రమంగా మస్తర్లు వేసినట్లు గ్రామస్థులు తెలిపారు.
వృద్ధులు, అనారోగ్య బాధితుల పేరిట దోపిడీ, పక్షవాతంతో మంచం పట్టిన రొక్కాల సత్యనారాయణ, అనారోగ్యంతో ఉన్న ఉప సర్పంచ్ భార్య కృష్ణవేణి, వయసు పైబడిన సీతారత్నం పేర్లపై 50 నుండి 100 రోజుల మస్తర్లు వేసి నిధులు డ్రా చేశారు.
ఫీల్డ్ అసిస్టెంట్ తన సోదరుడి పేరుతో ఉన్న పేమెంట్ మిషన్ (బయోమెట్రిక్ డివైస్) ఉపయోగించి, చదువురాని కూలీలను భయపెట్టి వారి వేలిముద్రలు తీసుకుంటూ డబ్బులు కాజేస్తున్నట్లు ఆరోపణలు వెల్లువెత్తాయి.
నిలదీసిన గ్రామస్థులు
సామాజిక తనిఖీ మీటింగ్లో దాదాపు 48 మంది పనికి వెళ్ళని వారి పేర్లను గుర్తించినట్లు గ్రామస్థులు పేర్కొన్నారు. దీనిపై గ్రామ సభలో ఫీల్డ్ అసిస్టెంట్ను మరియు అధికారులను నిలదీయగా, వారు ఎటువంటి సమాధానం చెప్పలేదని బాధితులు వాపోతున్నారు. కొందరు అధికారులతో ఫీల్డ్ అసిస్టెంట్ కుమ్మక్కై ఈ దొంగ సంతకాల పర్వాన్ని నడిపిస్తున్నారని వారు ఆరోపించారు.
చర్యలకు డిమాండ్
ప్రభుత్వ నిధులను పక్కదారి పట్టిస్తున్న ఫీల్డ్ అసిస్టెంట్పై కఠిన చర్యలు తీసుకోవాలని, దీనిపై సమగ్ర విచారణ జరిపి ప్రభుత్వ సొమ్మును కాపాడాలని గోడితిప్ప గ్రామ ప్రజలు కలెక్టర్ను కోరారు. గతంలో ఆర్టీఐ (RTI) ద్వారా వివరాలు కోరినా అధికారులు స్పందించలేదని వారు ఫిర్యాదులో పేర్కొన్నారు.
.jpeg)
Social Plugin