వంట చేసేటప్పుడు వచ్చే పొగతోనూ లంగ్ క్యాన్సర్

సాధారణంగా లంగ్ క్యాన్సర్ అంటే మనందరికీ గుర్తొచ్చేది సిగరెట్ తాగే అలవాటు. కానీ ఈ వ్యాధికి పొగతాగడం ఒక్కటే కారణం కాదు. ఇటీవల వైద్య నిపుణులు చెబుతున్న దాని ప్రకారం.. లంగ్ క్యాన్సర్ కేవలం పురుషులకే కాదు, పొగతాగని మహిళల్లో కూడా ఎక్కువగా కనిపిస్తోంది. దీనికి ప్రధాన కారణం వంట చేసేటప్పుడు వచ్చే పొగ మరియు వాతావరణ కాలుష్యం. 

వంట పొగతో లంగ్ క్యాన్సర్! 

వంట చేసేటప్పుడు వెలువడే పొగ, ముఖ్యంగా గాలి వెలుతురు సరిగా లేని ఇళ్లలో నివసించేవారికి చాలా ప్రమాదకరం. ఇలాంటి వాతావరణంలో దీర్ఘకాలం ఉండటం వల్ల ఊపిరితిత్తులపై తీవ్రమైన ప్రభావం పడుతుంది. వంటకు వాడే ఇంధనాల నుంచి వచ్చే పొగలో ఉండే హానికరమైన కణాలు శ్వాసకోశంలోకి వెళ్లి లంగ్ క్యాన్సర్‌కు కారణమవుతాయి. అందుకే, వంటగదికి సరైన వెంటిలేషన్ ఉండేలా చూసుకోవడం చాలా ముఖ్యం. పొగ వేసే ఇంధనాలను తగ్గించి, పరిశుభ్రమైన వాతావరణంలో వంట చేసుకోవాలి. 

ఈ లక్షణాలను నిర్లక్ష్యం చేయవద్దు! 

లంగ్ క్యాన్సర్‌ను ముందుగా గుర్తించడం చాలా అవసరం. మీకు లేదా మీ ఇంట్లో ఎవరికైనా ఈ క్రింది లక్షణాలు కనిపిస్తే వెంటనే వైద్యుడిని సంప్రదించండి. తరచుగా వచ్చే దగ్గు.. ఊపిరి తీసుకోవడంలో ఇబ్బంది.. బరువు తగ్గిపోవడం.. ఛాతిలో నొప్పి లేదా అసౌకర్యం.. అలసట లేదా అసాధారణమైన శ్వాస కారణాలుగా ఉంటాయి. 

ముందు జాగ్రత్తలే రక్షణ 

లంగ్ క్యాన్సర్‌ను నివారించడానికి కొన్ని సాధారణ జాగ్రత్తలు తీసుకోవచ్చు. వంటగదిలో వెంటిలేషన్ సరిగా లేకపోతే ఎగ్జాస్ట్ ఫ్యాన్ లేదా చిమ్నీ ఏర్పాటు చేసుకోండి. వాహనాల పొగ, ఫ్యాక్టరీల పొగ ఉండే ప్రాంతాలకు వెళ్లేటప్పుడు తప్పనిసరిగా మాస్కు ధరించండి. ముఖ్యంగా మధుమేహం, అధిక రక్తపోటు వంటి ఆరోగ్య సమస్యలు ఉన్నవారు తరచూ వైద్య పరీక్షలు చేయించుకోవడం మంచిది. సిగరెట్ పొగ నేరుగా లంగ్ క్యాన్సర్‌కు కారణం అవుతుంది కాబట్టి ఈ అలవాటును పూర్తిగా మానేయండి. 

లంగ్ క్యాన్సర్ అనేది కేవలం పొగతాగేవారికే వస్తుందనే అపోహను వీడి, వాతావరణ కాలుష్యం, వంట పొగ వంటి ఇతర కారణాలను కూడా దృష్టిలో పెట్టుకోవాలి. ఆరోగ్యకరమైన జీవనశైలి మరియు ముందు జాగ్రత్తలు తీసుకోవడం ద్వారా ఈ భయంకరమైన వ్యాధిని నివారించవచ్చు. మీ ఆరోగ్యం మీ చేతుల్లోనే ఉంది!